تجربة تشبع كل حواسك المبهر فى مصر ان كل مدينة فيها لها طابع و قصة و طبيعة مختلفة تماما عن غيرها بحبك يا بلدى مصر بورسعيد المدينة الباسلة الحرة احلى ١٠ حاجات حبتها فى بورسعيد ١. تستمتعوا باجواء شاطىء دعية فى الشتاء ٢. تتغدوا فى بورتو فيش ٣. تحلو من جلال كافيه ٤. تتصوروا فى جبل الملح ٥. تروحوا المسلة و نتصور مع الحمام ٦. تنزلوا فى المعدية و نتصور مع النورس ٧. تشوفوا الفلامينجو فى بورفؤاد ٨. تقعدوا فى هلنن بورفؤاد ٩. تشتروا حلويات من الفار ١٠. تفطروا فى العيوطى

سفرية بورسعيد بورفواد ازيكم يا شباب واحشني والله بعد سفرية دبي واسكندرية كان لازم اختم الشتاء بسفرية تكون تقيلة كدة في كل حاجة اكل وخروج ودلع ووقع الاختيار علي المدينة الباسلة بورسعيد. ومقدرش اقول ايه الجمال والتراث والحلاوة دي البوست دة هيكون مرجع لاي حد عايز يروح بورسعيد وبورفواد ويتبسط اليوم الاول وصلت بورسعيد الساعة ٢ بليل وروحت استلم الغرفة في الفندق قالي تعالي الساعة ٨ الصبح اية الي جابك دلوقتي اضايق لا يمكن روحت طلعت اتعشيت في بافلو برجر في طرح البحر واتمشيت في شوارع بورسعيد وفجاة لقيت نفسي قدام المعدية قلت يا واد ما تروح تصلي الفجر في المجمع الاسلامي ركبت وعديت وصليت الفجر وراء شيخ والله ما هنسي حرفيا جمال صوته وخشوعه خلصت بقي واتمشيت في مساكن بورفواد العتيقة واية بس الجمال دة تحس نفسك في القرن الماضي خلصت بقي ورجعت اخد المعدية لبورسعيد وهوبا يظهر مشهد طيور النورس وجمالهم ومشهد جميل الشروق وطيور النورس والبحر والقناة وتاخد احلي صور وفيديوهات تمام وصلت الفتدق وسايبلكم فيو الفندق في وسط المدينة صحيت عايزين نبدء يومنا بقي نزلت افطر في بقالة ريو من اقدم محلات بورسعيد ولكن قالي العيش خلص مياستش طلعت بقي علي Chimneycake وخدت احلي فطار وحليت وهنا طلعت بقي علي الممشي السياحي وتشوف السفن وهي بتعدي من علي القناة تخلص وتتطلع علشان تشوف ديلسيبس فاكر جملة جمال عبد الناصر قبل تاميم قناة السويس "كنت قاعد مع ديلسيبس "خلصت بقي تاخد قهوتك وتتطلع علي شاطي بورسعيد وجماله وتحضر الغروب من هناك وتركب خيل وتاخد احلي صور وتصلي المغرب في المسجد الي قدام الشاطي خلصت بقي عايزين نتغدا ايوة صح سوق السمك جيت قبل كدة والتسوية معجبتنيش فكنت بقلب كدة علي الفيس لقيت شيف اسمه اسماعيل وراء بتوع الخضار في السوق بيتكلمه عنه كويس مكدبتش خبر وروحت وهنا كانت الصدمة كلت أحلي اكلة سمك في حياتي والله نضافة اية وتتبيلة ايه ومعاملة ايه جمبري باتر فلاي وسمك شبار وبوري وشوربه واتصورت معاه ووعدته هنزل صورته عشان كل الناس تعرفه خلصت بقي نطلع نحلي بالتحلية البورسعيدي المشهورة التمرية و السمنيةو البقلاوة من جدو عزيز في مول الجراش وتخلص وتتطلع تتمشي في شارع طرح البحر وتشوف البرندات وتلف في شوارع بورسعيد تجوع تختم يومك عن بحبح في حواري بورسعيد يعني احلي لحمة وكفتة مشوية اليوم التاني بورفواد صليت الجمعة وبدات يومي بالفطار عند دكتور الفلسفة احمد شهدة في الثلاثيني واحلي سندوتشات ميكس نضيفة ومخدومة والدكتور احمد ليه قصة كبيرة ومشهو ازاي اخد الدكتوراة وتركها وفاتح العربية من سنة ٨٥ وبقينا اصدقاء وعلي تواصل ..خلصت اطلع حلي بالكساتا البورسعيدي الاصلي و تتطلع علي حديقة فريال الي قام فيها عرض افتتاح قناة السويس في عهد الخديوية وحديقة المسلة وتركب المعدية وتطلع علي بورفواد يعني الجزء الاسيوي من مصرنا و الجمال كله تبدئها من عند جبل الملح هو مكان حلو فقط للتصوير ولكنة مش حلو اوفريتيد جدا تخلص تتطلع علي شاطي بورفواد حيث الهدوء وشكل السفن معدي تحفة وتتفرج علي شكل بيوت مهندسين قناة السويس زمان وقد ايه البيوت دي كان بيسكنها ناس في العصر الماضي ماتو الان وحل بدالهم ناس وتحس انك رجعت لعام ١٨٠٠ ،،،خلصت تتطلع علي نادي التجديف يعني احسن فيو للغروب للقناة والمعدية تاخد قهوتك او شايك هناك وتبص علي جمال المنظر بعدين تتطلع علي كنيسة سانت أوجيني التاريخية في بورسعيد يعني التراث المسيحي وقصة اوجيني المشهورة وخلصت تلف شوية في شوارع بورسعيد وتطلع تتغدي كساديا في مطعم اسمه علي الباكية تحففففة وتحلي بقي بالموتشي من سنو بار وتشرب سموزي جيلي كولا من كافية جلال وتتمشي في المدينة الباسلة واوعي تمشي من بورسعيد قبل ما تجرب التقاطيع البورسعيدي من ابو حور جنب قرية الفيروز تحفة وصورته معايا موجودة وبس كدة واي صورة موجودة لاي منظر من تصويري واي سوال او حد عايز الصور بكواليتي يكلمني والي لقاء قريب في سفرية قريبة

أنا قضيت أحلي يومين في حياتي في بورسعيد ، وبعيد عن الأكل والشرب واللبس وجمال بورسعيد ونضافتها وهدوئها وجوها الأوروبي ، أنا اكتر حاجة عجبتني ولفتت نظري هي الناس ،أهل بورسعيد ،ناس جميلة ورايقة ، مافيش حد بيزعجك ، كل واحد في حالة ، اتمنيت إني أعيش في بورسعيد أو علي الأقل يكون لي اصدقاء من بورسعيد. تحياتي لأهل بورسعيد وشكراً علي حسن الضيافة

ازاي تروح بورسعيد المدينه العظيمه جدا جدا وتنبسط احلي انبساط ؟ خليني اقولك - هتروح بالقطر او السوبر جيت .. القطر تقريبا ب 35 والسوبر جيت ب 70 من الترجمان بس بلاش القطر الايام دي عشان فيه اصلاحات وبياخد ضعف الوقت تقريبا - السكن لو هتقعد كذا يوم ممكن تقعد في بيت الشباب هوا ارخص حاجه هناك ب 70 جنيه الليله بتكون الاوضه shared room والحمام خارجي وشامل الفطار بس الاوضه مكيفه ونضيفه - المواصلات الداخليه ميكروباص ب 3 جنيه والتاكسي بياخد منك لابعد مشوار 10 - 15 جنيه - الانشطه بقا يا حبيبي يا حبيبي * اول حاجه المحافظ عامل مبادره جميله اوي اوي اسمها حدائق بلا اسوار فكل الحدائق اللي هناك نضيفه جدا وكلها مجانيه ونضيفه فممكن تقعد فيها كدا وسط الخضره هتنبسط جدا * البحر انتا مجرد ما تقعد بالليل عالبحر تشرب كوبايه شاي او تاكل ايس كريم وتسمع شويه مزيكا دا روقان الدنيا كلها والبحر مجاني برضو وممتدد بطول المدينه كلها * ممكن تأجر عجله وتلف بيها بورفؤاد وتتفرج عالفلل اللي هناك بتاعت الهيئه اللي مبنيه علي الاستايل الفرنسي والانجليزي * تروح الفنار اللي يعتبر اقدم واول فنار مبني بالخرسانه المسلحه في العالم كله * تتمشي في ممشى ديليسبس وانتا بتسمع مزيكا * تركب المعديه ببلاش من بورسعيد لبور فؤاد ولو في الشتا خد معاك عيش واكله للنورس واتصور معاه * في دلوقت في الصيف تقريبا طيور الفلامنجو بتيجي في منطقه طبيعيه هناك بس ليهم وقت معين ودي في اخر بور فؤاد فلازم تروح بعجله او عربيه * تروح الملاحات وجبال الملح اكنك بتتصور في اوربا * تروح للجامع الابيض وتتصور جمبه صور عظيمه -نفكنا بقا من الانشطه ونيجي للكلام اللي بجد وحقيقي الاكل وتدليع الكرش *في منطقه اسمها الجراج ومنطقه تانيه اسمها مجمع المطاعم دول كلهم اكل روح ونقي اللي نفسك فيه * تروح سوق السمك زي الشاطر وتنقي السمك اللي نفسك فيه وتوديه لاي حد يشوهولك وتاخده وتاكل احلي اكله سمك عالبحر ولازم لازم لازم تجرب السيبيا عشان طعمها جامد جدا بجد *تاكل كاساتا من سلسبيلا *تاكل تمريه وسمنيه وزلابيا من الناس اللي بتعملهم جمب المعديه * تفطر مأنجونه مع شاي بلبن دي قرص العجينه بتاعتها جميله اوي بتتعمل علي شكل قواقع بس كدا البلد جميله اوي اوي اوي انا انبسطت فيها جدا وهاديه والناس جميله وبلد رايقه كدا بلد مزاج والله

رحلة بورسعيد رحلة اليوم الواحد سوق السمك الجديد في بورسعيد الصراحة حاجة محترمة والناس محترمين هناك والخدمة ممتازة رحلة بورسعيد لليوم الواحد ساعتين بالسيارة من القاهرة الطريق واسع وجيد وصلنا بورسعيد روحنا المعدية وروحنا بورفؤاد واتفرجنا علي مساكن الهيئة هناك رجعنا علي السوق التجاري واتمشينا شوية هناك. طلعنا علي سوق السمك الجديد واكلنا سمك. خلصنا الاكل وطلعنا علي حديقة فريال والممشي السياحي وقبل ما نرجع علي القاهرة روحنا علي سلسبيلا وجربت الكاساتا كانت اول مرة ليا حاجة تحفة وشكرا

ضربت ف دماغنا نسافر بورسعيد واحنا مش محضرين اي حاجه هيبقي يوم صد رد ولا هنقعد هناك ولا يومنا هيمشي إزاي اتحركنا من المنيا انا و عبدالرحمن الساعه 12.30 الليل اخدنا قطر لحد القاهره ومن القاهره اخدنا قطر ل بورسعيد ومحمد قابلنا في محطه الزقازيق واتحرك معانا وصلنا بورسعيد الساعه 11.30 قبل الضهر قولنا نروح نشوف بيت الشباب رحنا و علشان إحنا مش مرتبين لحاجه قالولنا إنتوا حاجزين قولنا لأ قالوا طيب انتظروا لحد م نلاقي مكان ليكم فضلنا حوالي ساعه وفي الآخر لقينا غرفه بس علي حظنا كان التكييف بايظ بس قولنا مش مهم اهي حاجه للنوم آخر اليوم وخلاص ريحنا و بعدها نزلنا نتمشي ع البحر قولنا نفطر الأول رحنا عند العيوطي فطرنا وبعدها رحنا ع البحر بورسعيد الشط بتاعها جميل جداً والله وكمان مش زحمه رغم انه كان تاني يوم العيد أمال ف الأيام العاديه بيكون ازاي بقي إحنا التلاته ولا واحد فينا بيعرف يعوم ف قررنا نمشي رجلنا وسط المياه بس كنا بناخد الشط رايح جاي أربع خمس مرات رجعنا غيرنا هدومنا وقررنا ننزل نتمشي ف البلد ونشوف سوق السمك و سوق اللبس بس مش عارف إحنا حظنا فقري ولا علشان أيام عيد ف لقينا اغلب البلد مقفوله قولنا نروح ناكل اكله سمك ماهو مش معقول نيجي بورسعيد و مناكلش سمك رحنا مطعم اسمه ملك السمك قدام البازار وبعدها رجعنا السكن نمنا و صحينا بعد الفجر نزلنا نتمشي ع البحر و رجعنا السكن جهزنا حاجتنا و فطرنا و بعدها رحنا سلسبيلا اكلنا كاساتا اللي مشهوره بيها بورسعيد وبعدها اتحركنا علي المعديه علشان نروح بورفؤاد وصلنا بورفؤاد ورحنا جبال الملح علشان ناخد احلي صور ويكأننا بنتصور في الجليد بعدها اتحركنا صلينا الجمعه في الجامع الكبير واتحركنا بعدها علشان نلحق نرجع المنيا تاني حقيقي بورسعيد ميكفيهاش يوم ولا اتنين محتاجه أسبوع والأسعار هناك كويسه وكان في أماكن كتير مرحنهاش للأسف بس الوقت مكفناش ان شاء الله تتعوض في المره الجايه

بورسعيد وجمالها لازم تروحو تشوفو جمال بورسعيد وتركبو المعديه مع طائر النورس حاجه كده في قمه السعاده ولو انت مصور انصحك لازم تروح تصور في بورفؤاد شويه صور من تصويري

النهارده بدات رحلة جديده المحافظة الاولى في كل سفرية كنت دايماً بلاحظ ان كل مدينة مصرية مشهوره باكله معينة ، و الاكله دي مفيش اي محافظة او مدينة تانية بتعملها او بتنتجها افضل منها و من هنا قررت ازور ال ٢٧ محافظة و اعرفكم اشهر الاكلات و المعالم اللى بتميز كل محافظة عن التانية و النهارده بدات رحلتي الاولى لمحافظة بورسعيد إسطنبول مصر و حبيت جداً اتكلم عن بورفؤاد و معدية بورفؤاد و اهل بورفؤاد و تفاصيل و جمال بورفؤاد لو رايح بورسعيد اوعى الوقت ياخدك قبل ما تجرب ال كاساتا او الكاستا و دي بقي اختراع يا كوتش ميكس بين الايس كريم و عين الجمل و الكريمة ، تفرفشك في يوم مشمس و تنعنشك في يوم شتوي ، مش كل الناس اتفقت عليها لكن انا حبيتها بصراحة ، و بعد تقيمات كتيره لاهل بورسعيد و اهل مصر عامة تصدرت الكاسات المركز الاول تحت بند اشهر اكلة في بورسعيد وهيفوتك كتير لو مجربتش يا كوتش من اول ما وصلت بورسعيد و انا حاسس بالانبهار و فضلت منشكح طول اليوم بصراحة سواء علي مستوى نظافة الشوارع او الجو العام فالمكان هيخطفك و كمان هتلاقى وسط البلد هناك تشبه وسط البلد بتاعتنا اللي في القاهرة و بعد الانبهار واللف و الدوران ركبت تاكسي اللي بالمناسبة ارخص اجرة تاكسي في مصر ، و روحت لمعدية بورفؤاد و هنا ساسكت قليلاً المعدية و طريقة نقل العربيات و الناس ، و تشوف بعينك قناة السويس و السفن الضخمه اللي رايحة جايه ببساطة كده من قدامك و الناس هناك بتتعامل معاها عادى و لو حظك حلو هتشوف دولفن او اتنين عايمين قصادك بس محصلش نصيب المرادي و لو رايح بدري شوية او اخر النهار هتلاقي طيور النورس اللي بنشوفها في المسلسلات التركى صوت موج البحر و الجو البارد و شكل المسجد الكبير من بعيد و المراكب و السفن و السماء و المبانى كل ده هيحسسك بجد و بجد اووى انك في اسطنبول و بعد وصولك البر التانى بورفؤاد شمال سيناء من قارة آسيا هتلاقي هناك كل حاجه بشكل اوربى زي مثلاً المباني اللي لفتت انتباهي جداً الميزه بجد في بورفؤاد ان مفيش عمارات و الدور ال ١٠٠ و ال ١٢٠ و الهم ده كله هناك المباني متواضعه جداً و ده بيساعد فى عملية السلام الداخلي و التفكير السليم و بيخليك تشوف الطبيعة بشكل اوضح بعيداً عن المرتفعات اللي بتخفي جمال السماء والأرض و كمان الاسعار لفتت انتباهي و ده عامة مش موجود في مصر سواء المواصلات او قاعدة الكافيهات و المطاعم كل المصاريف هناك في متناول الايد ده غير ان المعدية نفسها ببلاش ، يعني لو خايف تيجي بورسعيد عشان خايف من الميزانية الكبيره فانا بطمنك متقلقش ، و الله ممكن متدفعش غير حق مواصلاتك بس لو حابب تفصل شوية انا مبسوط جداً بالتجربة دى و كمان كانت بداية مبشرة لخوض التجربة و زيارة ال ٢٧ محافظة

تعالى اقولك على سفرية مصيف ببلاش في واحد من أجمد الموانئ البحرية في مصر ايوة انت قرأتها صح (ببلاش) ايوة بالظبط كدا هي بورسعيد .. اول حاجة عندك اختيارين عشان تروح بورسعيد يإما قطار مكيف أو تحجز سوبر جيت تبع أي شركة و دا الأفضل حاليا (لأن احنا قضينا ٨ ساعات ف القطار من القاهرة لبورسعيد بسبب اعمال اصلاحات و تجديد في السكك الحديد) .. وصلنا محطة قطار بورسعيد عايز تفطر هتلاقي مطعم اسمه البحرية هتفطر عنده بأقل من ٢٠ جنيه مهما طلبت .. هتروح على المعدية بسرعة عشان تعديك في قناة السويس تروح بورفؤاد وهناك هتتفرج على ڤيلل بورفؤاد المشهورة و كمان متنساش تروح جبل الملح تلعب شوية هناك و تاخد صورتين و كأنك قاعد ف نص التلج (نصيحة بلاش تروح ب كوتشي جديد عشان هيبوظ من الملح و اسأل مجرب ) .. هتطلع من جبل الملح تروح على المعدية تاني بس اوعا تنسى تاخد صورتين جامدين مع مسجد المجمع الاسلامي اركب المعدية بسرعة مفيش وقت للتفسير هتروح بورسعيد تاني و تدخل سوق السمك تاكل زي مانت عايز و طبعا مش محتاج اتكلم عن جودة و تنوع السمك هناك .. هتطلع بعدها على حديقة الفريال الحديقة جميلة جدا و مفتوحة لكل الناس و نظيفة هتلاقي فيها قعدات حلوة و هتلاقي هناك برج الطاحونة دا متنساش تتصور معاه بردو .. خلصنا كدا ؟ لا لسه اجمد كدا لسه شوية حلوين هتطلع على كورنيش ديليسيبس تتمشى لحد ما توصل لتمثال ديليسيبس في الأخر بعدها هتطلع على شاطئ بورسعيد وعشان تلحق ال golden hour قبل ما الشمس تغرب و تاخد اجمد صورتين هناك و لو عايز تنزل البحر .. هتخلص و تخرج من الشاطئ و تتجه غرب و تمشي في الممشى السياحي هتلاقي عليه كافيهات و مطاعم و هتلاقي كمان دراجات هوائية بتأجرها من اول ربع ساعة و انت طالع .. بالنسبة للأسعار سعر المكروباص ٢.٥ج سعر التاكسي لأطول مشوار جوا بورسعيد ١٥ج المعدية من بورسعيد لبور فؤاد و العكس (ببلاش) دخول جبل الملح (ببلاش) دخول حديقة الفريال (ببلاش) دخول شاطئ بورسعيد (ببلاش) مش قولتلك هتصيف و تتفسح ببلاش

بورسعيد سفرية في السريع للناس اللي عالطول بيبقي عندها شغل زي حلاتي كدة يوم جمعة صحيت بدري كدة و قررت اروح بورسعيد صد رد في السريع.. خدت الكاميرا بتاعتي و انطلقت ، ركبت سوبر جيت من القاهرة لبورسعيد ب 60 جنيه الطريق خد ساعتين و نص تقريبا اول ما وصلت خدت تاكسي لمطعم غنيم و ده من اشهر المطاعم هناك.. التاكسي خد 10 جنيه عالعموم هناك في بورسعيد اغلي مشوار التاكسي بيروحه بياخد 15 جنيه جبت سندوتشين فول و طعمية ب 6 او 7 جنيه حاجة كدة و بعدين اتمشيت في طرح البحر شوية و قعدت فطرت عالبحر ، حاجة كدة روقان بجد و بعد ما فطرت خدت تاكسي و طلعت علي المعدية عشان اروح بورفؤاد (المعدية ببلاش) كنت عامل حسابي في رغيف عيش حلو كدة عشان أكل طيور النورس وصلت بورفؤاد خدت تاكسي ب 10 جنيه برضو لحد الملاحات عشان اتصور عند جبال الملح لحد ما ربنا يكرم و اروح روسيا برضو دخول جبال الملح ببلاش مش عارف انا تقريبا كل حاجة هناك رخيصة او ببلاش بعد كدة رجعت علي منطقة الفلل و شوفت المعمار الأوروبي و جماله.. بجد كنت مبسوط جدا بالفن اللي قدامي ركبت المعدية تاني و رجعت علي بورسعيد و كنت ميت من الجوع.. قومت رايح علي سوق السمك اللي من برة تحسه مول كدة ، اشتريت من جوة سمكتين بوري السمكة نص كيلو مع نص كيلو جمبري و وديته يتشوي و نزل معاه سلطات و رز و شوربة جمبري و الناس روقت علينا بصراحة الاكلة دي شاكب راكب كانت عاملة 220 جنيه كان معايا واحد صاحبي فا انا النص و هو النص يعني كل واحد دافع 100 جنيه تقريبا.. طبعا خلصنا الاكلة دي و مكناش قادرين ناخد نفسنا و كنت عامل حسابي اروح اكل كاستا بس بجد مكنتش قادر بس قدام سوق السمك لقيت علوش دخلت جوة عملت شوبينج بسيط لذيذ كدة و قومت راكب و راجع القاهرة السفرية دي كلفتني 300 جنيه تقريبا لو هنا في القاهرة يتصرفوا في اي خروجة عادي حقيقي اتبسطت جدا باليوم ده

بورسعيد قادرة تسعدك او بتسعدنى انا بالاخص وبقا ادمان كل شهر لازم اسافرها من القاهرة افصل واشوف اصحابى احلى باستا من big pizza المكان دى عالمى فى الباستا والبيتزا احلي سمنية وتمرية من جدو عزيز فى الجراج حكاية بجد احلى قهوة تتشرب بجد بلاك فوكس بيعمل احلى فرابتشينو dodz وتشترى شيكولاتة من الفار وتشرب احلا افوكادو بالعسل والمكسرات من سموزى بارادايس بلد الخير والناس الجدعان واول مرة اجرب فطار نص مشكل وعجبنى اوى اوى..الاكل نظيف ومخدوم عليه وطازة والسعر مصدقتوش نص السعر اللى عندى فى القاهرة لو فطرت كدة وصاحبة المكان نسمة قمة فى الاحترام والذوق المكان فى الجراج الدور الاول ونادراً لما الاقى حد بيعمل كسكسى حلو عندى فى القاهرة..بس لما جيت بورسعيد جربت كسكسى ابو احمد اللى فى شارع طرح البحر قدام العيوطى عجبنى جدا ايه الجمال دة بجد واكلة نضيف اوي جربو تشترو منة على ضمانتى اكتر بلد بحبها وبحب اهلها جدا وبسافرها كل شهر

قررت انى اسافر بورسعيد وبمى انى من اسكندرية فا كان جديد عليا ان inDriver عملوا توصيل بين المحافظات ودي كانت سهلة جدا وحتى جوا بورسعيد كان فى توصيل عن طريق inDriver وكمان ممكن اعمل share driver واقسم تمن الرحلة بيني وبين اي حد اول حاجة عملتها روحت فطرت فى مطعم العيوطى وكان وهوا من اشهر المطاعم فى بورسعيد ودخلت المطبخ وشفت بيعملوا الفطار ازاي ومتنسوش تسألوهم علي شوربة العدس الي عندهم طعمها حلوة جدا لازم تجربوها وبعد كدا طلعت علي حديقة فريال وهيا للملكة فريال وتحولت لمزار سياحى والدخول مجانا وبعد كدا شفت اقدم الكنائس فى بورسعيد كنيسة العدرا مريم وشوفت منزل دليسبس وبعد كدا زورت الفنار ودا اول فنار فى مصر ولكنة مغلق حاليا وبعد كدا بيت الجالية الايطالية وبعد كدا قررت اسافر بالعبارة واروح قارة اسيا وازور بور فؤاد الرحلة الجميلة دي تحت رعاية inDriver ازاي تعمل رحله لزياره ١٥مكان في بورسعيد: °اهم نقطتين -تبدا يومك من ١٠ صباحا -تكون بتتنقل بعربيه *هتبدأ يومك بالفطار في مطعم العيوطي *تروح حديقة فريال *تروح فنارة بورسعيد *تروح مقر الجاليه الإيطاليه وتتفرج على جدارية موسوليني اللي مفيش غيرها في العالم بعد تدمير بتاعت إيطاليا *قبل ما تعدي من القاره الأفريقيه لآسياويه بالمعدية اقف اتصور امام فندق ناسونال اللي اتصور فيه فيلم المشبوه بتاع عادل امام وبعد كده روح اتفرج على قسم الشرطه اللي اتصور فيه الفيلم *هتركب المعديه عشان تعدي لقاره الاسياوية ترح لبورفؤاد *اتفرج على فلل هيئة قناة السويس *تروح اقدم نادي في مصر وهو نادي بورفؤاد انشأ عام ١٩٠٢ *تروح تتفرج على اسواق حمام *تروح جبال الملح *تروح تتصور امام الفيلا اللي اتصور فيها مسلسل ليالي اوجيني *ترجع على قارة افريقيا على بورسعيد و تروح سوق السمك وممكن تاكل هناك في قعدات وارشحلك تسأل عن محل سمك اسمه شهد القنال *تروح على البحر وتاخد كام صوره هناك مع القواقع والصدف *تروح تحضر الغروب في كافيه دعيه وخدلك صور كتيره هناك(خصوصا البنات اللي بتحب تتصور) وومكن تتغدي هناك سمك او اكل بدوي الشيف عندهم نفسه حلو جدا في الأكل والناس هناك لذيذه وخدومين. *روح سوبر ماركت محمود الفار اشتري شكولاتات وشوف العروض اللي عنده *حلي بالكاساته من سلسبيلا ب١٣ج القطعه او روح جرب الحلويات البورسعيديه زي التمريه والزلابيه البورسعيدي من محل فراوله في تلاتيني (ميكنش يوم جمعه عشان مش شغال هناك) او هتلاقي شباب منتشر في المحافظه بيعملها على عربيات وحلوه برده وفي واحد في بورفؤاد بس مشكلته انك هترجع على هناك لبورفؤاد فهتهدر وقت كبير جدا واسمه العربي عند المعديه وده من اقدم الناس في مجال الحلويات ديه وبيشتغل على عربيه مش محل. وبكده تكون جبت المحافظه كلها من شرقها لغربها و استمتعت بكل حاجة عرض أقل

ماذا لو .. هتروح بورسعيد تقضي هناك جمعة وسبت؟! 🔹 هتركب من موقف المرج بيجو ٧ راكب بـ ٥٥ جنيه، في أوبشن لسوبر چينت VIP بـ ٨٠ جنيه، جربته في الرجوع وكان جامد الصراحة، باص واسع ومريح ومجهز كويس. 🔹الإقامة ممكن تروح بيت الشباب، وده هسيب لكم صورة لأرقامهم تحت وهتبقى واضحة إن شاء الله، وممكن تنزل في فندق، بورسعيد مليانة فنادق بتبدأ أسعارها من ٣٠٠ و ٣٥٠ في الليلة. 🔹 الفطار في مكان اسمه La Viata في شارع عاطف السادات أو قول للتاكسي عند طرح البحر، هو كافيه بس .. على أد مشروبات وأكل خفيف للفطار، وممكن تقعد فيه طول اليوم عادي، وفيه نت كويس جدا، وتعامل الناس هناك ذوق. 🔹 الغداء .. أحلى حاجة ممكن تعملها تروح سوق السمك، عند الشيف شامي، تاكل أحلى سمك طازة .. وعندك اختيارين يا تقعد تاكل في السوق، يا تاخد الأكل وتروح على البحر .. فين بقى؟ في كافيهات عند المطار كده على البحر، يا تقعد مباشر، يا تقعد تاكل على الروف والبحر يبقى قدامك، وبتدفع بس حق الكرسي، هتلاقوني سايبة تحت منيو الشيف شامي 😍 🔹 خلص بقى وعدي على سلسبيلا هات كاساتا 😋 وده أحلى آيس كريم بالقشطة ممكن تاكله وفي بورسعيد بس 😍 وفي اليوم التاني .. 🔹 ممكن تروح مطعم اسمه Chimney Cake .. هناك بيعملوا أكلة مجرية (من المجر) رائعة اسمها على اسم المكان 😍 والحشو بيبقى حلو أو حادق، هتلاقوني سايبالكم المنيو تحت تبصوا عليه، المطعم صغنن كده ومحندق وبتشوف الأكل وهو بيتعمل قدامك، وبجد طعمها خطير 😋 🔹 للنقنقة .. جرب اللامؤاخذة 🤣 الأكلة اسمها كده أنا مليش دعوة 😂 ودي عبارة عن بيض سبيط مقلي، والأكلة دي البورسعيدية بس اللي يعرفوها .. جربوها في مطعم بكلويزة، سيبالكم المنيو تحت برده 🤓 🔹 المزارات 📍المعدية اركب معدية تحيا مصر .. أحلى من القديمة، وبدورين .. وللأسف لسه مفيش نوارس نحط لها أكل، بس المنظر نفسه تحفة 😍 📍فلل بورفؤاد دي الفلل اللي بناها الفرنساويين، وحاليا سكانها العاملين في قناة السويس. 📍استراحة السادات الفلة اللي كان بيقضي فيها وقته في الأجازات، وهي في نفس طريق الفلل كده وحتى على نفس الشكل شوية، ومش مفتوحة للدخول، بتتشاف من برا بس. 📍الملاحات جبال الملح بقى وأحلى صور كأنك في مكان جليدي 🥶 وبتدفع ٢٠ جنيه قبل الدخول. 📍الممشى السياحي أحلى منظر للمراكب والسفن على يمينك، والفنار هيقابلك على شمالك .. وده أقدم مبنى خرساني موجود حاليا، وفي النهاية تمثال ديليسبس اللي اتشال. 📍المتحف الحربي دبابات وطيارات من حرب ٧٣ وصور بانوراما بتوثق الحرب، من دقة وروعة الصور هتنبهر أن اللي رسمها فنانين مش مصريين! وأحلى حاجة من ساعة ما تدخل هيبقى معاك مرشد بيعرفك كل صورة بتمثل إيه، وهتسمع منه حكايات عن شجاعة شعب بورسعيد في الحرب، وقصص الفدائيين والمقاومة الشعبية. 📍ميدان الشهداء أو المسلة كأنك في أوروبا بالظبط .. مساحة واسعة وحمام كتير ملموم حواليك خد أكل من هناك وأكله 😍 📍حي المناخ ممكن يبقى حظك حلو وتشوف هناك الصيادين وهم بيصلحوا الشبك، وتقف معاهم يعرفوك كل نوع من أنواع الشبك إيه. 📍شارع ٧/٣ ده ممر كله شجر وأماكن للقعدة والأكل .. متاحة ببلاش لو حبيت تجيب أكلك من أي مكان وتقعد تاكل فيه. 📍التجاري والتلاتيني اشتري كل اللي نفسك فيه من هناك أو من أي حتة .. بورسعيد عاملة زي مول مفتوح، مكان ما هتمشي هتلاقي محلات، عجبني أوي عندهم أزواق حلوة ومختلفة، لكن للأسف الأسعار عالية، أعلى حتى من القاهرة 🙁 📍التفريعة وطيور الفلامنجو 🦩 هتاخد لها تاكسي ودي حتة بعيدة شوية، هي عبارة عن تفريعة من قناة السويس على يمينك، وبحيرة ملح على شمالك، وهناك عايش الفلامنجو، انت وحظك بقى .. ممكن يبقى قريب وتشوفه بوضوح أو العكس، المشكلة أنك ممنوع تمشي جوا البحيرة، هناك أبراج مراقبة. 📍حديقة فريال جميييلة فوق الوصف، مش بس عشان الزرع والقعدات الهادية، كمان عشان الديكورات الحلوة اللي فيها 😍 📍التمشية بالليل في ديليسبس باي وده ممر كله مطاعم صغيرة وفي أماكن للقعدة. 📍علوش نخلي ختام الرحلة مسك ونعدي نجيب شكولاتات ونسكافيهات مستوردة بخصومات جامدة😍 طولت عليكم معلش .. بس هي بلد حلوة هنعمل إيه! الأماكن دي مع المطاعم ممكن تتقسم على يومين حسب الأقرب ليك في المكان اللي هتنزل فيه. التاكسي بيوديك أي مكان بـ ١٠ جنيه، ولو الطريق طويل شوية بياخد ١٥، ومتوفر in driver وكريم عادي. وأخيرا بورسعيد بلد جميلة ونضيفة، لما تزوروها مترموش فيها زبالة وحافظوا عليها زي ما هي

بورسعيد وبورفؤاد جمال لا منتاهي

في بورسعيد يا مين يعد المراكب، في بورسعيد الشمس دايما تقارب، والغيمة دايما بعيد"❤️ بقتبسها بكل إيمان وتصديق عن المدينة اللي وقعت ف غرامها وصار فراقها أليم وعدم العودة لها مستحيل❤️ للمرة الثانية✌️ بتتربع بورسعيد بقلبي بكل ما فيها شوارعها ومعالمها وطبعا شعبها. بتستوقفني كل مرة معاملة أهلها البعيدة كل البعد عن الاستغلال بل ع العكس كرم الضيافة وحسن المعاملة والابتسامة والكلمة الحلوة. كنت معتقد إني مش حلاقي نفس الاستمتاع والاندهاش بما إنها الزيارة الثانية ولكن زادت متعتي وأنا حاسس إني بقيت عارفها وعارف إزاي أشوف أحلى ما فيها قبل ما تخلص رحلتي، والحلو اللي فيها كتيييير. ✍️ خد عندك ياسيدي: - حديقة المسلة. 👌قعدة رايقة وهادية وحمام كتيييييير بيرفرف حواليك واعمل حسابك ع أكل للحمام. - حديقة فريال. 👌وزادت قيمتها عندي لما عرفت إنها اتعملت علشان افتتاح قناة السويس. - شاطئ طرح البحر 👌ومدى الاستمتاع بجمع الصدف من ع الرمل. - شاطئ دعية 👌وجو لذيذ كده للقعدة والتصوير وكمان مراجيح 😁 - الفطار من عند العيوطى 👌حتاكل أجمل فطار بجد وبعدها حتلاقي سعر مش حتتوقعه مقارنة بغيره. - سلسبيلا والكاساتا😍 👌وهنا حدث ولا حرج عن أحد أعظم أكلات بورسعيد المميزة. - مساجد بورسعيد❤️ واللي كلها عبارة عن تحف معمارية لدرجة إن أحد زائري بورسعيد من الإخوة الأقباط سمعته ف المعدية بيقول أنا بحب أعدي بورفؤاد مخصوص علشان بحب أشوف المسجد ده❤️ - متحف بورسعيد 👌علشان تعرف إن التراب اللي انت ماشي عليه ف البلد دي فعلا غالي. - التسوق وده أنواع 👈سوق السمك وفعلا دورت كويس المرة دي وجبت أكلة سمك وهم بسعر ممتاز الحمد لله وطعم روعة وكانت تجربتي المرة دي من محل سمك اسمه التوحيد والنور. 👈الملابس؛ عندك سوق كامل للبالة والاستوكات مباشرة بجوار سوق السمك. 👈محلات الفار علشان تدوق شيكولاتة غير ف الطعم. - جبال الملح 👌 الخلاصة؛ شوية صور أوروبية بامتياز. - طيور النورس 👌 وانت بتعدي للأرض الأسيوية بورفؤاد بالمعدية متنساش تعمل حسابك ف عيش تأكل به النورس اللي حيطير بك ف السما أكيد بورسعيد فيها ما هو أكتر من كده بكتير، لكن ده اللي سعفني الوقت وزورته ع مدار يومين، والمدهش ف الأمر -وحيفهمي اكتر ف النقطة دي الاسكندرانية- إن دخول كل اللي تم ذكره ده مجاني بالكامل، اللهم إلا جبال الملح لكن ما دون ذلك فهو بدون مقابل. الحدائق الكتير المنتشرة بأنحاء المحافظة كلها ف غاية الجمال والنظافة ومفيش واحدة منهم بتذكرة دخول. الشاطئ مجاني تماما للتمشية والتجول بحرية، متلاقيش مستأجر جاي يفرض عليك الجلوس ع تربيزة وطلب مشروب ولا تلاقي بوابة وتذكرة دخول. فعلا بلد وشعب بورسعيدي شبعان وعنده عزة وغنى بالنفس وفكرة استغلال زائر بحكم إنه جاي يقضي وقت حلو دي منعدمة😘، ده انت حتى متلقيش سايس ف الشارع يفرض عليك الإتاوة🙄 والكلام لكِ ياجارة😂 علشان ما سبق وكلام كتير مقلتوش، حابب أقول لك روح وشوف بورسعيد وحتدعي لي. 🤚قبل ما أنهى البوست؛ 😍حابب بكل معاني الامتنان والحب أشكر أ. عمرو الفار 💌 ع اهتمامه ليا بداية من معرفته بقدومي ومتابعته ليا ع مدار اليومين واطمئنانه عليا وعلى أسرتي وكمان ضيافته لنا بقرية الجميل واللي كانت ف منتهي الجمال والرقي ما شاء الله. 😍أشكر كل بورسعيدي 😘 ع أخلاقكم وذوقكم وطباعكم وبلدكم الجميل. 😍كمان أوجه الشكر لأسرتي اللي شاركتي أيامي الجميلة دي زوجتي وأختي وابنتاي جنة الله وجميلة❤️ أسأل الله أن يبارك لي فيهم ويحفظهم اللهم آمين🤲

في يوم ضبابي ملئ بالغيوم و الدنيا بتشتي خفيف رحت بورسعيد المدينة الساحلية الجميلة أوروبية الطابع في أجواء خريفية أوروبية الصراحة شميت ريحة السعادة من اول مدخل المدينة االي مكتوب علية portsaid وسط الورد في شياكة كده ..في سعادة ..ريحة الجو حلوة والناس رايقة ..الناس لذيذة اوي ولكنتهم شربات كنت بحب اتكلم معاهم عشان اسمعها ( وعلي فكرة انا بحب الإنسان اللي بيحافظ علي اصوله سواء في اللكته او اللبس او الاكل قبل ما تراثنا يوشك عالانقراض ) بورسعيد ليها طابع خاص خواجاتي كده المباني والاجواء حتي قسم البوليس هناك متدلع وشكله حلو ومكتوب عليه police اكنه طالع من فيلم اجنبي وعلي فكرة ده اللي اتصور فيه فيلم المشبوه فكرة المعدية لوحدها انك تروح من قارة افريقيا لقارة اسيا في ٥ دقايق وتتفرج علي طيور النورس والمراكب والميه و تفضل رايح جاي من جمال المشهد و بهجة اللحظة وكل ده من غير ولا مليم ده شئ منفرد ومميز مش موجود في اي حته غير بورسعيد اما الجزء،الاسيوي (بورفؤاد) هي قطعة بونبون مش مدينة حاجة منتهي ال الله بحر و بحيرة و طيور فلامنجو و جبال ملح وفلل وقصور وورد وجناين طول مانت ماشي مش عارف تقول الله علي ايه ولآ ايه بورسعيد مليانه مزارات وتتلف في يوم...انا رحت بدري فطرت فول وفلافل و بعدين قعدت عالبحر وشربت قهوة ولميت صدف و اتفرجت عالمراكب والصيادين و بعدين طلعت علي شارع الجمهورية كله مباني عتيقة أوروبية الطراز خدنا المعدية بعدها وطلعنا علي بور فؤاد رحت جبل الملح والبحيرة بس حظي وحش مشفتش فلامنجو و اكتر حاجة حبيتها اللف في شوارع بور فؤاد وسط فلل الهيئة البديعة و الخضرة والورد وأشجار الجهنمية اللي محاوطاها رجعت بعدها بورسعيد كلت اكلة سمك من السوق وبعدين حبست بشاي بالنعناع علي قهوة بلدي وروحت متفوتوش برده الطاحونة والفنار وحديقة فريال..انا ملحقتش اروح كان لازم امشي بدري بس ليا عودة الخلاصة ..بورسعيد تشرح القلب الحزين

فى ناس طلبت منى انى اقول بورسعيد فيها ايه عشان تتزار والحقيقة والصراحة بعضا من المصريين وخاصة المرشيدين مش عارفين يزوروه بورسعيد …الصور لسياح برازيلين بعت كتير على مدى سنوات وكنت بابيع بورسعيد لكل السياح البرازيلين لكن معظمهم مكنش بيرجع مبصوت وده كان بيرجع ان المرشيدين مش عندهم علم ب ايه الى ممكن يتم زيارته والزبون من الاخر كان بيتقلب فى زيارته والناس كانت بترجع زعلانة منى وبيدعوه على الشركة وده كان بيزعلنى انا شخصيا وبتحز فى نفسى انا من شارع عبده امبوبة ببعت الناس الباعتة دى دى المدام خصمتنى عشان صحبها زعله وام لقمان والمكسيكية كمان عشان كدة لما روحت للمدام اصريت اوريها وقالت لا عندك حق لانى كنت بعمل اعلانات فى التلفزيون ويكاد اكون الشركة الوحيدة الى كانت بتبيع بورسعيد وبعدين اجىء اشوف تقرير الزبون يقولى المرشد المصرى قالنا بورسعيد مفيهاش حاجة ورغم ان فى ناس عملت مجهودات كبيرة من بورسعيد زى مستر منير والمصور المحترف ايمن ابو الحسن لكن الناس لم تساعدنى رغم مكناش عايزين حاجة غير الاهتمام لكن وشعرت كثيرا أن بورسعيد للاسف مكنش مرغوب فيها من الناس عموما هقولكم بورسعيد يتزار فيها ايه خد عندك : هتوصل بورسعيد وهتطلع على القناة الجديدة وتعبر ناحية بورفؤاد وتروح ع الملاحات الى بقت النهاردة مزار زى انت فى سويسراء وبعدين هتروح عند بيوت الهيءة قناة السويس وبعدها تعبر المعدية وتروح عند جنينة فريال تتصور عند الطواحين الهولندية وبعدها ممكن تاخد الحناطير تلف لفة فى حى الافرنجى كله من اول شارع ممفيس والممشى السياحى شارع البحر وتقف عند الكاستن تتغدا عنده او تاخدك العربية السياحة لسوق السمك الجديد تتغدا هناك وبعدها تزور المتحف الحربى وبعدها اخر صور فى المثلة و بعدها تقف عند سلسبيلا تجرب كاساتا وبعدها وقت فرى ومحلات الفار الى فيها الحلو كله كله كله وبعدين تطلع ع القاهرة ولو فى المستقبل القريب الدنيا اتحسنت يفتح متحف القناة الى فيها حجات تاريخية …وشكرا …بذمتكم بورسعيد مفيهاش حاجة ؟ قولولى المحتوى وحش ؟ عشان انا تعبت نفسيا من الناس عمله ونفسى ارجع انزل سياح تانى بورسعيد عيش وعايش الناس لاحظات تاريخية سيتذكرها التاريخ الى الابد …كان معاكم محمد يوسف مصطفى درويش من شارع عبده امبوبة - ساوباولو البرازيل