لا لا ياجماعة...فعلا كل كلمة اتقالت عن جمال بورسعيد طلعت ف محلها ويمكن لم توفى حقها لكن حقيقة اللي يزور بورسعيد مرة فأكيد مش حتكون آخر مرة. لو اسكندرية هي عروس البحر الأبيض المتوسط ف بورسعيد هي جميلة البحر الأبيض المتوسط❤️ إيه الجمال ده ياجماعة بجد فعلا يا بختكم يا كل من سكن بها. مش عارف أبدأ منين لكن كانوا يومين غاية ف الروعة والجمال وتجديد الروح والطاقة، مدينة تمدك بالفرحة والأمل والفخر إني دي جزء من بلدك مصر، البلد ليفيل النظافة فيها عااااالي جدا، والشعب البورسعيدي نفسه عنده ثقافة النظافة والاهتمام وده ظاهر جدا لإنك مش حتشوف "مهندسين نظافة" كتير لكن الطرق نظيفة. إنما كطرق بقى فأنا كاسكندراني بحسدك من كل قلبي الطرق كلها سليمة ما شاء الله مفيش تكسير وحفر ولا هبوط كنت بعيط ع حالنا لأ وكمان إيه! مفيش توكتوك طيب أنتوا إزااااي كده. المساحات الخضراء كتير جدا وتشجير الشوارع بكافة عالية جدا بيزيد من حلاوة الأماكن، مش بس حديقة فريال أو المظلة، ولكن كل شارع لا يخلو من أشجار ما شاء الله ودي تجربة ناجحة جدا أتمنى أشوفها ف اسكندرية بداية من رفع كفاءة اللي موجود حاليا زي حديقة الشلالات وإنشاء حدائق جديدة وتشجير للطرق كمان التطوير بخصوص سوق السمك والتجمعات زي المولات وسوق الحصار والملابس على مستوى راقى جدا وغيره وغيره ما شاء الله حاجة بجد تفرح. ودي تفاصيل للي حابب يخوض التجربة 👈بدأت الرحلة فور وصولنا بفطار من العيوطي، وتقييمي إنه يستحق الشهرة اللي وصلها، أنا فعلا أكلت أطعم فلافل تذوقتها ف حياتي، "فلافل خلطة اسمها كده ف المنيو" وهم ياجماعة ايه ده وكمان طقم السلطات اللي بينزل تحفة وعلى رأسه البابا غنوج وسلطة الجبنة القديمة ما شاء الله تسلم إيديكم إضافة لنظافة المكان والأسعار كويسة جدا تبعا لوضعنا الحالي. 👈الخطوة التانية كانت تجولنا ف شوارعها شوية قابلنا بعد العيوطي بشوية كلمة" بورسعيد" المشهورة ف حديقة صغيرة نزلنا واتصورنا معاها.اعتمدت ع جوجل ماب طوال الرحلة ونظرا لصغر حجم المدينة وجمال طرقها فكانت الأمر سهل الحمد لله. 👈بدأت بالبحث عن المعدية، عديت بالعربية وكان عبور مجاني وكنت عامل حسابي بقى ف عيش وأحلى وأجمل إحساس وطيور النورس بتحلق فوق ع مسافة قريبة جدا وصوتها ينقلك تركيا ع طول 👈روحت لجبال الملح؛ ف بورفؤاد الرقيقة وقضينا وقت ممتع وجو شتوي أوروبي كده لذيذ، بس نصيحة محدش قالها قبل كده بس أنا كنت عامل حسابي، خد معاك شراب احتياطي اسمع مني بس وحتعرف ليه لما تروح بنفسك 👈من جبال الملح للحي الأوروبي والفلل الجميلة والشوراع الراقية الهادئة وكمان مرّينا سريعا ع شاطئ بورفؤاد. 👈للمعدية مرة تانية علشان نرجع بورسعيد ونخوض تجربة النورس مرة كمان وفعلا متحرموش نفسكم من تجربة إحضار عيش وتأكلوهم مش بس تتفرجوا عليهم، وقت لما بياكلوا بيعملوا جو تفاعلي رائع غير كده مفيش أكل حيفضلوا ع سطع مياه القنال. 👈نزلت من المعدية وتوجهت لحديقة المسلة وهنا برده أوعى تنسى تجيب أكل للحمام، كمية حمام كبيييرة جدا حتكون حواليك لما تبدأ ترمي شوية أكل وحتلاقي رفرفة محوطاك وأحلى صور بقي وطبعا وجود تسالي معاك حيفرفش القعدة ف الحديقة الجميلة دي. 👈موعد الغدا قرّب والفقرة المنتظرة قربت وهي سوق السمك البورسعيدي، بصراحة بقى من ناحية الأسعار محستش بفرق لكن سوق السمك الجديد مبنى ع طراز عالمي بصراحة ونضيف جدا وطعم السمك تحفة، بتشتري السمك من أكتر من ١٠٠ محل لبيع السمك داخل مبنى السوق الجديد ومحلات منتشرة برده تسوى وتشوي لك الأكل وتوفر لك مكان تقعد فيها، لكن النصيحة الغالية جدا هنا وانت بتشتري السمك حتلاقي حد من تبع محلات الشوي يقف جنبك يحاول ياخدك عنده ده تخلع منه وتشوف القعدة الأول شكلها عامل ايه التربيزات والكراسي نظيفة ولا وتختار أفضلهم وتديله اللي اشتريته، لإن ف النهاية كلهم بيعملوا أكل بشكل كويس والسعر واحد مقابل التسوية والأرز والسلطات لكن اللي يفرق بقى اهتمام المحل بالقعدة، ركز علشان نقطة بسيطة زي دي ممكن تضيع عليك جمال التجربة ككل 👈أمام سوق السمك حتلاقي محلات الاستوكات والبالة والبيع بالكيلو، جولة بقى ف شوارع بورسعيد للتسوق وهضم الجريمة اللي ارتكبناها ف سوق السمك حتى نهاية اليوم الأول. 👈مع بداية اليوم التاني وفي الصباح الباكر الساعة 7 صباحا اتحركنا ع شاطئ بحر بورسعيد خاصة كافية دعية عنده ديكور تصوير تحفة جميل جدا ما شاء الله وكمان فري بدون مقابل، هناك واتصورنا وفطرنا ع بالبحر في جو لذيذ كده، وياسيدي ووقت ما إحنا بنفطر إذ يمر علينا النادي المصري البورسعيدي جاي يتمرن ع الشاطئ والعميد حسام حسن يسلم علينا وطبيب الفريق يعطي بنتي زبادي وعسل في لفتة طيبة وجميلة جدا مع إني مش مليش ف الكورة بس حبيت النادي المصري والعميد وحبيت أكتر الطبيب الجميل ده 👈جاء معاد التحرك لحديقة فريال واللي بتفتح الساعة التاسعة صباحا، وأقل ما شاء الله هي تحفة فنية غاية ف الجمال، الطاحونة والزرع المظلات الكبيرة والصغيرة وكله كله حاجة مبهرة فعلا وجميلة، وحالها كحال كل حاجة ف المحافظة مهتمين جدا بنظافتها والحفاظ عليها، بس حاول تشبع من حديقة فريال سريعا قبل ما تلاقي نفسك بتقضي يومك كله فيها. 👈قررنا نخوض تجربة المعدية تاني علشان نأكل طيور النورس تاني ونروح أسواق حمام للملابس في بورفؤاد بيعمل عروض كويسة ع فكرة. 👈نرجع بقى المعدية؛ وحشتنا طيور النورس ونروح لسلسبيلا ف بورسعيد جنب المعدية مش بعيد وتدوق الكاسات وهنا سبيوني أعيط شوية، أنا أزاي مجتش أول يوم كمان علشان أدوقها، دي مينفعش تأكلها مرة واحدة كده وتسيبها وتروح بلدك اللي مفهاش كاسات دي ممكن تخلص فلوسك عليها وانت مرتاح، لو حتزور بورسعيد ف رحلة اليوم الواحد حاول تروح أول اليوم و ف نص اليوم وانت مروح علشان تشبع من حلاوتها، آه وخد واحدة معاك برده اتسلى بها ف السكة وانت مروح شوية نصايح كده من خلال تجربتي: لو معاك أطفال، متقلقش حتلاقي حمامات حواليك كتير انت اسأل بس وحتلاقيها ع مستوى جيد من النظافة. لو قدرت تبعد عن يوم الجمعة حتكون انت الكسبان، بتكون زحمة جامد ورحلات وكده، أي يوم تاني حتستمتع بالمساحات. لو معاك عربيتك أعتقد حتكون أكثر إمتاعا من وجودك مع جروب وأوتوبيس علشان من وجهة نظري برنامج التيم اللي انت معاه ممكن يخالف رغبة ف إنك تقضي وقت أطول مكان انت حابه، أو تكرر تجربها زي المعدية. وآخر حاجة.. الكاساتا متتاكلش مره واحدة بس
